Верхнядзвінск. Бяспека ў летніх лагерах.

         У прышкольных лагерах Верхнядзвінскага раёна адбыліся прафілактычныя сустрэчы з прадстаўнікамі раённага аддзела па надзвычайных сітуацыях.

         У ходзе сустрэч першы намеснік начальніка Яўген Гладыш расказаў дзецям аб правілах бяспечных паводзін у быце і на вуліцы. Асаблівая ўвага была нададзена бяспечнаму адпачынку ля вады, забароне на купанне без суправаджэння дарослых, а таксама дзеянням у выпадку ўзнікнення небяспечнай сітуацыі. Дзецям нагадалі, як важна быць уважлівымі пры звароце з электрапрыборамі, не гуляць са запалкамі і выконваць асцярожнасць у двары і на дарозе.

         Каб замацаваць атрыманыя веды, спецыяліст сектара прапаганды і ўзаемадзеяння з грамадскасцю правяла для школьнікаў «караоке бяспекі». У атрадах дзеці падзяліліся на дзве каманды – хлопчыкі супраць дзяўчынак. Кожная каманда з задавальненнем прадэманстравала свае здольнасці ў выкананні песень на тэму бяспекі.

         Дзеці спявалі з усмешкамі і радасцю, падтрымлівалі адзін аднаго і з азартам удзельнічалі ў гульні. А галоўнае – у вясёлай і нязмушанай атмасферы яны запомнілі важныя правілы, якія дапамогуць захаваць жыццё і здароўе.

         Па выніках займальнага спаборніцтва, як і павінна быць у добрай дзіцячай сустрэчы, перамагла дружба.