Верхнядзвінскія ратавальнікі на вакацыях
Ратавальнікі Верхнядзвіншчыны прынялі актыўны ўдзел у рэспубліканскай акцыі МНС «Вакацыі без дыму і агню!». А разам з імі – школьнікі горада і раёна, якія наведваюць аздараўленчыя лагеры.
У госці да ратавальнікаў у пажарную час №1 прыйшлі дзеці з Волынецкай і Сар'янскай школ. Тут начальнік дзяжурнай змены Сяргей Шышко паказаў гасцям усе памяшканні часткі і расказаў пра побыт ратавальнікаў.
– Не ведаў, што пажарны за ноч спіць усяго толькі 4 гадзіны. Як вы высыпаецеся? – пацікавіўся адзін са школьнікаў.
– Заступаючы на дзяжурныя суткі, кожны пажарны ведае, якая адказнасць ляжыць на ім і як важна быць заўсёды на варце. Бо ў выпадку трывогі – ратавальнікі неадкладна кідаюцца ў бой з вогненнай стыхіяй. І тут ужо не да сну, – расказаў старшы інструктар-ратавальнік Алег Байкоў.
У пажарнай машыне вельмі шмат цікавых прыбораў і інструментаў. У гэтым пераканаліся хлопчыкі і дзяўчынкі, калі аглядалі пажарную аўтацыстэрну і кабіну машыны.
Дзеці з задавальненнем прымяралі форму пажарных, мералі каску і рабілі памятныя фотаздымкі. Цікавасць іх прыцягнуў таксама лабірынт, усталяваны на тэрыторыі аддзела па надзвычайных сітуацыях. Яго прайсці хтосьці вырашыў з заплюшчанымі вачыма, хтосьці, трымаючыся за плечы адзін аднаго, а хтосьці і зусім гускам, як пры эвакуацыі з задымленага памяшкання.
Дзеці ўспомнілі правілы бяспекі на летніх вакацыях разам з інспектарам прапаганды бяспекі жыццядзейнасці Крысцінай Дамасевіч.
– Памятайце важныя правілы паводзін на вадаёмах і дзяліцеся сваімі ведамі з сябрамі. Чым больш людзей ведае іх – тым менш будзе небяспечных сітуацый, – звярнулася да гасцей пажарнай часткі Крысціна Анатолеўна.
У завяршэнні сустрэчы, дзеці спрабавалі самастойна падаць ваду з пажарнага рукава. А самыя актыўныя нават здолелі трапіць пад распыленую брую вады. Пакінулі дзеці пажарную частку з зарадам энергіі і ведамі бяспекі.