Сцяг горада Верхнядзвінска і Верхнядзвінскага раёна зацверджаны ўказам Прэзідэнта Рэспублікі Беларусь №86 ад 28.02.2011 года. Уяўляе сабой прамавугольнае палотнішча жоўтага колеру з суадносінамі бакоў 1:2, у цэнтры асабовага боку якога размешчана выява герба горада Верхнядзвінска. У ніжняй частцы палотнішча пад гербам гарызантальна размешчаны зверху ўніз тры палосы блакітнага, жоўтага і блакітнага колеру, якія складаюць адпаведна адну дваццатую, адну дваццатую і адну дзясятую шырыні палотнішча.
Герб зарэгістраваны ў Гербавым матрыкуле Рэспублікі Беларусь 26 ліпеня 2002 года №94 уяўляе сабой - у залатым полі французскага шчыта вершнік у сталёвых даспехах з узнятым мячом у правай руцэ і авальным чырвоным шчытом з выявай сярэбранага «патрыяршага» крыжа ў левай, конь пакрыты блакітнай трохканцовай папонай. Упершыню быў заснаваны Указам Кацярыны 11 ад 21 верасня 1781 года як адзін з гербаў Полацкага намесніцтва.
Ад гістарычнага герба горада Дрыса сучасны геральдычны сімвал горада Верхнядзвінск адрозніваецца адсутнасцю ў верхняй яго частцы ўзнікаючага двухгаловага Дзяржаўнага арла Расійскай імперыі і імператарскай кароны. Узброены вершнік з мячом і шчытом у залатым полі на дрысенскім гербе паўтараў выяву, напісаную на гербе Полацка, які быў зацверджаны тым жа ўказам імператрыцы.
Герб заснаваны Указам Прэзідэнта Рэспублікі Беларусь ад 20 студзеня 2006 года № 36. І ўяўляе сабой - у сярэбраным полі іспанскага шчыта перавязь чырвонага колеру з трыма сярэбранымі лістамі.
Сапраўдны росквіт Асвеі пачаўся з 1749 г., калі яе ўладальнікам стаў мінскі ваявода Ян Аўгуст Гільзен (1744-1754). Ён пабудаваў знакаміты палац, касцёл, разбіў парк, запрасіў сясцёр міласэрнасці, якія заснавалі тут манастырскі шпіталь.
Будынак былога асвейскага шпіталя захаваўся да нашых дзён і з'яўляецца адным з самых старых помнікаў архітэктуры ў раёне. Фамільны герб Я.Гільзена, які ўяўляе сабой гістарычную каштоўнасць, адаптаваны да сучасных умоў.
Срэбны колер поля – гэта колер седавечнай старажытнасці гарадскога пасёлка Асвея, якому больш за 500 гадоў. Чырвоны колер перавязі сімвалізуе мужнасць, стойкасць і шматпакутнасць жыхароў Асвеі, якія перанеслі за сваю шматвяковую гісторыю не адно нашэсце ворагаў і праявілі несакрушальную мужнасць у гады Вялікай Айчыннай вайны. Лісце на перавязі асацыююцца з лаўровымі і з'яўляюцца сімвалам мудрасці, велічы і славы людзей, якія жывуць на асвейскай зямлі. Таму герб, створаны на аснове фамільнага герба Я.Гільзена, з'яўляецца своеасаблівым звязуючым звяном паміж мінулым і будучыняй, паміж продкамі і нашчадкамі.
Аўтар герба і мастак в.і.Шчасны.