Расследаванне крымінальнай справы аб генацыдзе насельніцтва Беларусі ў гады Вялікай Айчыннай вайны працягваецца

Генеральная пракуратура Рэспублікі Беларусь у красавіку 2021 года ўзбудзіла крымінальную справу па факце генацыду насельніцтва Беларусі падчас Вялікай Айчыннай вайны і ў пасляваенны перыяд.

У аснову прынятага рашэння пакладзены звесткі аб гібелі мільёнаў беларусаў і іншых асоб з прычыны звярстваў нямецкіх акупантаў і іх пасобнікаў.

Пачаты Генпракуратурай крымінальны працэс па расследаванні фактаў генацыду накіраваны на ўсталяванне канкрэтных асоб з ліку нямецкіх захопнікаў і іх пасобнікаў, якім удалося пазбегнуць адказнасці за забойствы мірных жыхароў, здзекі і катаванні ў канцлагерах і гета, масавае зганянне грамадзянскага насельніцтва ў нямецкае рабства.

У гады Вялікай Айчыннай вайны Верхнядзвінскі раён (тагачасныя Дрысенскі і Асвейскі раёны) пацярпеў істотна, была знішчана значная частка насельніцтва, спалена вялікая колькасць вёсак, якія так і не ўдалося аднавіць.

У лютым-сакавіку 1943 года на тэрыторыі Дрысенскага і Асвейскага раёнаў праводзілася карная аперацыя «Зімовае чараўніцтва», у якой прымалі ўдзел латышскія батальёны, што знішчалі мірнае насельніцтва, спальвалі населеныя пункты.

Мэтай дадзенай карнай аперацыі было стварэнне «чыстай» 40-кіламетровай зоны ад партызан-падпольшчыкаў.

Указаная аперацыя праводзілася на тэрыторыі сучаснага Верхнядзвінскага, Расонскага раёнаў, Себежскага раёна Расійскай Федэрацыі.

У ходзе расследавання крымінальнай справы аб генацыдзе насельніцтва Беларусі ў гады Вялікай Айчыннай вайны пракуратурай Верхнядзвінскага раёна дапытаны пацярпелыя асобы, якія знаходзіліся ў канцлагерах, сведкі, праведзены агляды месцаў здарэнняў (ваенных пахаванняў, помнікаў Вялікай Айчыннай вайны), вывучаны архіўныя матэрыялы, устаноўлены найменні населеных пунктаў, спаленых і зноў не адноўленых.

У цяперашні час расследаванне крымінальнай справы аб генацыдзе насельніцтва Беларусі працягваецца, устанаўліваюцца новыя, раней не вядомыя месцы пахавання салдат Чырвонай Арміі, прозвішчы і імёны карнікаў, шкода, прычыненая эканоміцы рэгіёну ад генацыду.

Звесткі з крымінальнай справы дазволяць паставіць перад міжнароднымі арганізацыямі пытанне аб прызнанні Беларусі пацярпелай ад генацыду, спыніць спробы абясцэніць гістарычную праўду.

Намеснік пракурора

Верхнядзвінскага раёна

малодшы саветнік юстыцыі

М.В.Лаўданскі