Праграма развіцця да 2030 года і падрыхтоўка сустрэчы з вучонымі. Лукашэнка заслухаў даклады Галоўчанкі і Каранніка
Прэзідэнт Беларусі Аляксандр Лукашэнка 29 кастрычніка заслухаў даклады старшыні праўлення Нацыянальнага банка Рамана Галоўчанкі і старшыні Прэзідыума Нацыянальнай акадэміі навук Уладзіміра Караніка. Пра гэта БЕЛТА паведамілі ў прэс-службе беларускага лідара.
Цэнтральнай тэмай даклада кіраўніка Нацбанка стала дапрацоўка праграмы сацыяльна-эканамічнага развіцця Беларусі да 2030 года. Гэтым займаецца рабочая група пад кіраўніцтвам Рамана Галоўчанкі, да 1 лістапада дапрацаваны дакумент павінен быць прадстаўлены Прэзідэнту. Кіраўніку дзяржавы сёння дакладзена аб асноўным змесце праграмы, ключавых галінах і сферах, на якіх зроблены акцэнт. У канчатковым выглядзе дакумент плануецца вынесці на зацвярджэнне Усебеларускага народнага сходу, пасяджэнне якога пройдзе 18 і 19 снежня гэтага года.
Кіраўнік Нацбанка таксама далажыў аб выпрацаваных рашэннях па праблемных пытаннях, якія ўваходзяць у кампетэнцыю Нацбанка. У прыватнасці, па тэмах, якія маюць грамадскі рэзананс, і па зваротах беларусаў. Старшыня Прэзідыума Нацыянальнай акадэміі навук Уладзімір Каранік далажыў аб ходзе падрыхтоўкі сустрэчы Прэзідэнта з навуковай грамадскасцю. Было падкрэслена, што навуковая сфера ў тым ліку павінна ўнесці свой значны ўклад у рэалізацыю задач па развіцці краіны ў наступнай пяцігодцы. Акцэнт - на практыка-арыентаваныя распрацоўкі, узмацненне сувязі навукі і вытворчасці, імпартазамяшчэнне і нарошчванне экспартнага патэнцыялу, асваенне запатрабаваных у рэальным сектары інавацыйных напрамкаў.
