«Даводзіцца ратаваць нашы векавыя ўстоі». Чаму Лукашэнка надае столькі ўвагі манастырам
Беларусь - шматнацыянальная і шматканфесійная краіна. Праваслаўе - самая распаўсюджаная рэлігія ў нашай дзяржаве. Храмы, манастыры - гэта не толькі значныя аб'екты для вернікаў. Гэта ўнікальныя помнікі з пункту гледжання архітэктуры і мастацкіх стыляў. У апошнія гады асаблівая ўвага надаецца Свята-Успенскаму Жыровіцкаму і Полацкаму Спаса-Еўфрасіннеўскаму манастырам. У гэтым выпуску YouTube-праекта БЕЛТА "Па факце: рашэнні Першага" мы раскажам, дзе ў Беларусі з'явіўся праваслаўны цэнтр паломніцтва, які манастыр Аляксандр Лукашэнка лічыць "дзіўным месцам" і што хаваюць фрэскі храма XII стагоддзя.
Сёлета споўнілася 505 гадоў Свята-Успенскаму Жыровіцкаму стаўрапігіяльнаму мужчынскаму манастыру. А з дня здабыцця цудатворнай Жыровіцкай іконы Божай Маці - 555 гадоў. Прэзідэнт павіншаваў беларусаў з гэтымі знакавымі датамі. Ён адзначыў, што "мільёны людзей знаходзяць надзею, дакранаючыся да святыні, і духоўна ўзбагачаюцца, наведваючы абіцель". Сёлета з фонду Прэзідэнта выдзелілі Br6 млн на праекты ў галіне культуры і мастацтва. Частка грошай пойдзе на падтрымку Успенскага сабора манастыра - на рэстаўрацыю іканастаса. Ён быў выраблены ў 1676 годзе. Манастыр у апошнія гады пераўтварыўся. Тут і старанні будаўнікоў, і святароў, і, вядома, дзяржавы.
"Царква - гэта духоўная сувязь грамадства. Духоўнасць дапамагае чалавеку знайсці правільныя падыходы ў пераадоленні цяжкасцей. І жыць надзеяй, упэўненасцю, захоўваць адносіны з блізкімі і далёкімі. І разумець, што ўсё ў гэтым свеце мінае. Вера, надзея, любоў, выкананне евангельскіх запаведзяў - тое, што патрэбна сучаснаму чалавеку", - лічыць Мітрапаліт Мінскі і Заслаўскі Веніямін, Патрыяршы Экзарх усяе Беларусі.
На тэрыторыі манастыра знаходзіцца духоўная семінарыя. Наведваючы Жыровічы ў 2021 годзе, Аляксандр Лукашэнка падкрэсліў, што неабходна ствараць камфортныя ўмовы для навучання тут.