«Новая старонка летапісу суверэннай Беларусі». Лукашэнка адкрыў Міжнародны выставачны цэнтр
Прэзідэнт Беларусі Аляксандр Лукашэнка 8 мая ва ўрачыстай абстаноўцы адкрыў Міжнародны выставачны цэнтр у Мінску, перадае карэспандэнт БЕЛТА.
"Мы адкрываем новую старонку летапісу нашай суверэннай Беларусі. Мы гэта цуда назвалі Мінскім міжнародным выставочным цэнтрам, - заявіў кіраўнік дзяржавы падчас цырымоніі, на якую былі запрошаны прадстаўнікі грамадскасці сталіцы, кампаніі-забудоўшчыка і будаўнічых арганізацый, якія прымалі ўдзел у узвядзенні гэтага аб'екта. - Сучасны, без усялякіх лішніх дэталей, што парыць аістам над маляўнічым кутком нашай сталіцы, ён прызначаны паказаць свету наш найбагацейшы патэнцыял і дасягненні беларускай нацыі".
Прэзідэнт заўважыў, што адкрыццё адбываецца ў планавым парадку - як дамовіліся, так і зрабілі. Гаворачы пра тое, якая задума рэалізавана ў гэтым цэнтры, кіраўнік дзяржавы распавёў пра свой даўні візіт на ранейшую выставачную пляцоўку ў Мінску, дзе дэманстраваліся дасягненні народнай гаспадаркі. "Я ў яго зайшоў і ахнуў. Я не думаў, што Беларусь умее ўсё гэта рабіць", - сказаў кіраўнік дзяржавы. Цяперашняя моладзь гэтак жа далёка не ўсё ведае пра шырокія магчымасці сваёй краіны, упэўнены Прэзідэнт. Таму вельмі важна сканцэнтраваць ў адным месцы ўсё тое, чаго беларусы дасягнулі за гады незалежнасці, сабраць самае лепшае. "Задума ў мяне была ў тым, каб пабудаваць тут гэты цэнтр, размясціўшы на пастаяннай аснове самыя высокія дасягненні нашай краіны, нашай суверэннай Беларусі - вось тое, што мы зрабілі самі, не ў складзе велізарнай краіны, а самі, беларусы, сваім розумам і сваімі рукамі", - падкрэсліў Аляксандр Лукашэнка.