Лукашэнка: памяць і праўда аб Перамозе стаяць шчытом на шляху запанавання ў свеце хаосу і ідэй перавагі

Памяць і праўда аб Вялікай Перамозе стаяць шчытом на шляху запанавання ў свеце хаосу і ідэй перавагі. Пра гэта Прэзідэнт Беларусі Аляксандр Лукашэнка заявіў на цырымоніі ўскладання вянкоў і кветак да манумента Перамогі ў рамках патрыятычнай акцыі "Беларусь памятае!", перадае карэспандэнт БЕЛТА.

Кіраўнік дзяржавы нагадаў, што Перамога над фашызмам была здабыта агульнымі намаганнямі ўсіх народаў Савецкага Саюза, якія аб'ядналіся супраць агульнага ворага. З імі ваявалі супраць гітлераўскай арды дзясяткі іншых народаў свету. У тым ліку Еўропы і ЗША. "І мы гэтага не забылі, у нас добрая памяць, у адрозненне ад іх", - заўважыў Прэзідэнт.
"Нашы памяць і праўда надзейным шчытом стаяць на шляху запанавання ў свеце хаосу і ідэй перавагі. Даюць імунітэт супраць хлуслівых ідэй і схаваных маніпуляцый, становяцца маяком у моры выклікаў і пагроз новага часу, - падкрэсліў Аляксандр Лукашэнка. - Мы не сталі на калені перад ворагамі тады і не маем намеру схіляць галаву перад імі і сёння. Вайна навучыла беларусаў свята берагчы родную зямлю, абараняць яе цаной уласнага жыцця і захоўваць памяць аб подзвігу продкаў. Мы не дапусцім паўтарэння таго, што бачылі і перажылі яны".

Як адзначыў Прэзідэнт, на прыкладзе герояў вайны ў Беларусі выхоўваюць моладзь. Менавіта ёй адводзіцца галоўная роля ў захаванні памяці аб подзвігу бацькоў, дзядоў і прадзедаў, зберагчы якую трэба перш за ўсё ў сем'ях. "І тады ніякая палітычная кан'юнктура не перакрэсліць і не аслабіць духоўнае адзінства пакаленняў, - сказаў кіраўнік дзяржавы. - Інакш размовы аб дружбе і міры, аб тым, што мы за ўсё добрае, але супраць усяго дрэннага, зробяць іх, а значыць, і наша будучыню безабароннымі перад тварам пагроз новага часу"

Крыніца: belta.by