Падрыхтоўку да першага пасяджэння VII УНС абмеркавалі на нарадзе ў Лукашэнкі

Прэзідэнт Беларусі Аляксандр Лукашэнка 18 красавіка правёў нараду па пытаннях падрыхтоўкі першага пасяджэння VII Усебеларускага народнага сходу, перадае карэспандэнт БЕЛТА.

Да першага пасяджэння VII УНС застаецца літаральна тыдзень, падрыхтоўка гэтага мерапрыемства выйшла на фінішную прамую.

"Як мы дамаўляліся, яшчэ раз абмяркуем тыя арганізацыйныя праблемы, якія трэба абмеркаваць, каб забяспечыць эфектыўную працу Усебеларускага народнага сходу", - адзначыў Аляксандр Лукашэнка.

"Аргкамітэт быў створаны. Як мне пастаянна дакладваюць, збіраліся, працавалі, выпрацавалі асноўныя дакументы. Але ёсць шэраг пытанняў, якія тычацца пастаяннага Прэзідыума, намеснікаў старшыні (трэба было б параіцца, якім чынам мы будзем прапаноўваць Усебеларускаму народнаму сходу фарміраваць іх). Словам, трэба забяспечыць нармальны, кіраваны працоўны працэс УНС, пачынаючы ад афармлення горада (без усякага перабору, каб мы не марнавалі лішнія грошы на пустэчу) да залы пасяджэння", - падкрэсліў Прэзідэнт. Асобна кіраўнік дзяржавы спыніўся на арганізацыйных момантах, звязаных з забеспячэннем усім неабходным дэлегатаў УНС. "Яшчэ раз хачу папрасіць, каб было найуважлівейшае стаўленне да дэлегатаў УНС, пачынаючы ад забеспячэння іх харчаваннем і пражываннем і заканчваючы забеспячэннем неабходнымі матэрыяламі для працы. Што ў гэтым плане зроблена? Што яшчэ трэба зрабіць?" - спытаў Аляксандр Лукашэнка.

Як далажыў прэм'ер-міністр Раман Галоўчанка, аргкамітэт па падрыхтоўцы да УНС шчыльна працаваў, і ўсе даручэнні, дадзеныя кіраўніком дзяржавы ў сувязі з гэтым маштабным мерапрыемствам, выконваюцца службовымі асобамі вычарпальна і своечасова.

"На бягучы момант цалкам сфарміраваны склад удзельнікаў УНС. Дэталёва адпрацаваны пытанні іх транспарціроўкі, размяшчэння, харчавання, забеспячэння бяспекі, - сказаў Раман Галоўчанка. - Усяго на дадзены момант 1162 дэлегаты, у тым ліку па пасадзе 412 чалавек, шляхам абрання - 750 чалавек, уключаючы 402 мужчыны і 348 жанчын".
 
Ад мясцовых саветаў дэпутатаў для ўдзелу ў УНС дэлегаваны 350 чалавек, ад грамадзянскай супольнасці - 400. "Усе працэдуры абрання дэлегатаў праведзены ў поўнай адпаведнасці з законам", - падкрэсліў прэм'ер-міністр.

Што тычыцца запрошаных асоб, якія не з'яўляюцца дэлегатамі, але прымаюць удзел у УНС, - іх 715 чалавек, у тым ліку 68 заслужаных прадстаўнікоў беларускага грамадства і сем рэгіянальных дэлегацый, у кожную з якіх уваходзяць 68 чалавек, уключаючы прадстаўнікоў рэгіянальных СМІ, сферы аховы здароўя, адукацыі, сілавога блока, прадпрыемстваў, а таксама былыя кіраўнікі рэгіёнаў і ганаровыя грамадзяне адміністрацыйна-тэрытарыяльных адзінак. На УНС запланавана прысутнасць 31 замежнага грамадзяніна. Гэта прадстаўнікі міждзяржаўных інтэграцыйных аб'яднанняў і замежныя дыпламаты.

Крыніца: belta.by