Лукашэнка: Беларусь зацікаўлена ва ўмацаванні ўзаемадзеяння з Індыяй да ўзроўню стратэгічнага партнёрства

Прэзідэнт Беларусі Аляксандр Лукашэнка павіншаваў Прэзідэнта Індыі Драупадзі Мурму і народ гэтай краіны з нацыянальным святам - Днём Рэспублікі. Аб гэтым БЕЛТА паведамілі ў прэс-службе беларускага лідара.

"У Беларусі з вялікай цікавасцю назіраюць за сістэмнымі пераўтварэннямі і поспехамі вашай цудоўнай краіны ў сферах лічбавай эканомікі, касмічных даследаванняў, гарадской інфраструктуры і зялёнай энергетыкі", - гаворыцца ў віншаванні.

Беларускі бок высока цэніць значны ўклад індыйскай дзяржавы ў забеспячэнне міжнароднай бяспекі, устойлівага развіцця, пераадоленне глабальных выклікаў, а таксама канструктыўную пазіцыю па пытаннях глабальнага і рэгіянальнага парадку дня на пляцоўках міжнародных арганізацый і аб'яднанняў, падкрэсліў Аляксандр Лукашэнка.

Кіраўнік дзяржавы абазначыў зацікаўленасць краіны ў далейшым умацаванні ўзаемадзеяння з Індыяй да ўзроўню стратэгічнага партнёрства і гатоўнасць да рэалізацыі сумесNых праектаў у розных галінах: машынабудаванні, электратранспарце, фармацэўтыцы, сельскай гаспадарцы і тэхніцы, навуцы, адукацыі і культуры.

"Буду рады сустрэцца з Вамі ў хуткім часе ў Мінску ці Нью-Дэлі для абмеркавання практычных крокаў пашырэння супрацоўніцтва", - адзначыў Прэзідэнт.

Аляксандр Лукашэнка пажадаў Драупадзі Мурму выдатнага здароўя і шчасця, а дружалюбнаму народу Індыі - міру і дабрабыту.

Крыніца: belta.by