Лукашэнка запатрабаваў падвергнуць найсур'ёзнейшаму аналізу працу НАН

Прэзідэнт Беларусі Аляксандр Лукашэнка запатрабаваў падвергнуць найсур'ёзнейшаму аналізу работу Нацыянальнай акадэміі навук.

Пра гэта кіраўнік дзяржавы заявіў на нарадзе па пытанні ўдасканалення сістэмы планавання і кантролю за рэалізацыяй стратэгічных праектаў, перадае карэспандэнт БЕЛТА.

Кіраўнік дзяржавы звярнуў увагу, што за трыццаць гадоў у Беларусі сфарміравана цэлая сетка даследчых інстытутаў у розных галінах, працуюць Камітэт па навуцы і тэхналогіях, Нацыянальная акадэмія навук. Але ў дачыненні да НАН Прэзідэнт даручыў правесці комплексную праверку работы: "Зімой акадэмію навук трэба падвергнуць найсур'ёзнейшаму аналізу. Дай бог, каб было так, як нам кіраўнік Акадэміі навук дакладвае: яны сёння робяць усё - ад беспілотнікаў да вырабаў з сухога малака, якія прадаюць у Кітай. Робяць усё. Паглядзім, ці так гэта. Я маю на ўвазе электрамабілі і гэтак далей".

Працягваючы размову аб дзейнасці беларускіх вучоных, Аляксандр Лукашэнка адзначыў, што іх даследаванні, аналітычная работа, прагнозы навукова-тэхнічнага прагрэсу на дзесяцігоддзі наперад, вядома, патрэбныя. "Але трэба прызнаць, што рэальны сектар эканомікі масава выкарыстоўваць працы вучоных чамусьці не імкнецца, - звярнуў увагу Прэзідэнт. - Да вытворчасці даходзяць не ўсе новыя распрацоўкі". Паводле яго слоў, па-сапраўднаму буйных, прарыўных праектаў за гэты час створана не так шмат.

Крыніца: belta.by