Лукашэнка распавёў пра фонд Першага: колькі грошай на рахунку і на што іх будуць расходаваць

Прэзідэнт Беларусі Аляксандр Лукашэнка, адказваючы на пытанні журналістаў падчас рабочай паездкі ў Брэсцкую вобласць, расказаў падрабязнасці пра створаны фонд Першага, перадае карэспандэнт БЕЛТА.

Кіраўнік дзяржавы звярнуў увагу, што ідэя стварыць у краіне адзіны фонд пад патранатам Прэзідэнта была выказана ім даўно, а рэалізавана - адносна нядаўна. Перш за ўсё фонд Першага створаны для мэт дабрачыннасці - каб сабраць сродкі ў адным месцы і аказаць дапамогу тым, хто ў ёй сапраўды мае патрэбу.

"Галоўнае, што мы зможам акумуляваць грошы тых, хто неабыякавы. І з майго боку - гарантыя таго, што гэтыя грошы развораны не будуць", - растлумачыў Аляксандр Лукашэнка.

Пакуль фонд не пачаў актыўную дзейнасць: на яго рахунку пакуль адсутнічаюць паступленні, яшчэ няма кіраўніка і гэтак далей.

"Я, можна сказаць, сваё імя туды аддаў - фонд Першага, каб мы маглі сабраць нейкія грошы і дапамагчы тым, хто мае патрэбу. Гэта галоўная яго задача", - дадаў Прэзідэнт. Ён адзначыў, што пасля закрыцця шэрагу фондаў і арганізацый, якія пад выглядам дабрачыннасці і іншай грамадскай дзейнасці спрабавалі ў 2020 годзе раскачаць абстаноўку ў краіне, аказалася складана знайсці спосаб, каб паўдзельнічаць у дабрачыннасці. "Мы прыкрылі тут. І тыя, хто нам дапамагаў і хочуць дапамагчы, - юрыдычна не могуць. Тады я кажу: давайце пад эгідай Прэзідэнта створым гэты фонд, адкрыты абсалютна, каб людзі, якія ў гэты фонд уносяць сродкі, разумелі, куды ідуць гэтыя грошы", - сказаў беларускі лідар.

Аб неабходнасці стварыць у Беларусі адзіны нацыянальны фонд пад патранатам Прэзідэнта Аляксандр Лукашэнка заяўляў у жніўні 2022 года на прадстаўленні на пасаду кіраўніка справамі Прэзідэнта Юрыя Назарава.

"Ведаю, што многія фонды і фондыкі з Беларусі сышлі, некаторых мы проста прыбралі, таму што вы ведаеце, чым яны займаліся: на замежныя грошы здзяйснялі перавароты. Спрабавалі здзейсніць. Таму мы, калі вывучылі працу гэтых фондаў, вымушаны былі ад іх адмовіцца", - адзначыў Аляксандр Лукашэнка.

Кіраўнік дзяржавы нагадаў, што раней даручаў Кіраўніцтву справамі стварыць адзіны нацыянальны фонд, які б працаваў пад патранатам Прэзідэнта. "Тыя шчырыя, сумленныя людзі, якія хочуць дабрачыннасцю ў нас займацца, з задавальненнем прыйдуць у гэты фонд, таму што будуць разумець, што ні адна капейка з яго ўлева-ўправа не сыдзе, а будзе выкарыстана на высакародныя мэты", - заявіў Аляксандр Лукашэнка.

Крыніца: belta.by