Такія людзі цяпер на вагу золата. Лукашэнка даў баявое заданне вядомай беларускай франтавіцы і ўсім ветэранам

Ветэраны Вялікай Айчыннай вайны - захавальнікі праўды і процівага тым, хто адмаўляе генацыд беларускага народа і апраўдвае нацызм. Пра гэта Прэзідэнт Беларусі Аляксандр Лукашэнка заявіў на цырымоніі ўручэння дзяржаўных узнагарод, перадае карэспандэнт БЕЛТА.

"Я вельмі рады, што сёння ў гэтай зале ёсць выдатная жанчына, якая належыць менавіта да ваеннага пакалення. Гэта Валянціна Баранава. Франтавічка, якая дайшла да Прагі, тэлеграфістка, спартсменка. Валянціна Пятроўна, у лістападзе вам спаўняецца 5 разоў па 20. Можна толькі марыць!" - заўважыў Аляксандр Лукашэнка.

Валянціна Баранава ўдзельнічае ў рабоце савета ветэранаў Гродна, вядзе актыўны лад жыцця. У яе асобе Прэзідэнт падзякаваў усім ветэранам і ўдзельнікам вайны. "Нізкі паклон тым, хто змагаўся на фронце, змагаўся з ворагам на акупаванай тэрыторыі, выжываў у канцлагерах, самааддана працаваў у тыле", - сказаў кіраўнік дзяржавы.

"І ў мяне ёсць да вас вялікая просьба, нават баявое заданне: жывіце як мага даўжэй, працягвайце выхоўваць нашу моладзь. Без вас нам будзе вельмі цяжка, - звярнуўся да ветэранаў Аляксандр Лукашэнка. - Такія людзі, як вы, зараз на вагу золата. Вы - захавальнікі праўды. Вы - процівага тым, хто адмаўляе генацыд беларускага народа, апраўдвае нацызм, якімі б абліччамі ён ні прымаў".

Валянціна Баранава ў сваю чаргу прызналася, што рада бачыць Прэзідэнта не на экране, а наяве. "Дзякуй вам вялікі за тое, што наша Беларусь за час вашага праўлення стала моцнай і свабоднай, незалежнай, квітнеючай і міратворчай рэспублікай. Гэта самае галоўнае!" - падкрэсліла яна.

Ветэран таксама звярнулася і да ўдзельнікаў цырымоніі: "Родныя мае, і вам дзякуй вялікі! Бо вы тое пакаленне, якое прыйшло на змену нашым пакаленням - удзельнікам вайны. Мы сыдзем з жыцця, вы застанецеся. І будзеце разам з Аляксандрам Рыгоравічам працягваць будаваць наша мірнае, шчаслівае жыццё".

Крыніца: belta.by