Падрыхтоўка да праходжання паводкі
Падрыхтоўка да праходжання паводкі
З прыходам вясны непазбежна надыходзіць перыяд паводак і разводдзя. Узмацненае раставанне снежнага покрыва, разліў рэк і азёр, багатыя ападкі могуць прывесці да значных негатыўных наступстваў: затопленне жылых дамоў і сацыяльных аб'ектаў, размыванне аўтамабільных дарог, разбурэнне мастоў, аварыі на інжынерных сетках, гібель жывёл і раслін і мноства іншых непрыемных здарэнняў.
Пад'ём узроўню вады таксама небяспечны для арганізацый і прадпрыемстваў. Паводкавыя воды могуць пашкодзіць электраабсталяванне, што можа выклікаць пагрозу жыццю і здароўю людзей і жывёл, а таксама стаць прычынай узнікнення пажараў з прычыны кароткага замыкання.
Пры затопленні паветраных ліній электраперадачы вада можа падмываць апоры. Пры гэтым узнікае вялікая верагоднасць крытычнага нахілу або падзення апор, што ў сваю чаргу выклікае абрывы і правісанні правадоў у непасрэднай блізкасці ад паверхні вады. Натуральна, такія аварыі смяротна небяспечныя для людзей і жывёл, якія знаходзяцца ў зоне падтаплення. Сапраўды такія ж наступствы могуць узнікнуць з прычыны затопленага электраабсталявання трансфарматарных падстанцый, якія знаходзяцца на балансе прадпрыемстваў.
Каб пазбегнуць негатыўных наступстваў пры затопленні электрасустановак, у першую чаргу іх неабходна абясточыць. Разам з гэтым да наступлення паводкі на кожным прадпрыемстве павінны быць праведзены наступныя падрыхтоўчыя мерапрыемствы:
- вызначыць магчымыя зоны падтаплення і прааналізаваць шляхі руху вады па тэрыторыі прадпрыемства;
- ажыццявіць вываз снегу з тэрыторыі, якая можа трапіць у зону затоплення;
- праверыць тэхнічны стан і ажыццявіць ачыстку ліўневай каналізацыі, дрэнажных прылад, кабельных каналаў і іншых інжынерных канструкцый;
- па магчымасці ўсталяваць трапы і насцілы для эвакуацыі работнікаў і ажыццяўлення вытворчых работ па ліквідацыі наступстваў затоплення;
- правесці рэвізію і падрыхтаваць да актыўнай працы помпавае абсталяванне і наяўныя сродкі для адпампоўкі вады;
- дадаткова ўмацаваць усе камунікацыйныя збудаванні (цепласеткі, водаадвядзенне, электрычныя сеткі, газавае абсталяванне);
- абавязкова правесці дзеянні па абароне падвальных памяшканняў;
- па магчымасці забяспечыць герметычнасць электрычных шчытоў, якія знаходзяцца ў зоне падтаплення;
- праверыць тэхнічны стан і працаздольнасць аўтаномных рэзервовых крыніц сілкавання, а таксама забяспечыць неабходны запас паліва для іх;
- правесці агляд ВЛ, ТП, КТП, якія знаходзяцца на тэрыторыі магчымага затаплення;
- прыняць вычарпальныя меры для аднаўлення кабельных ліній, якія знаходзяцца на пашкоджанні;
- забяспечыць надзейнае электразабеспячэнне аб'ектаў I і I асаблівай катэгорыі па надзейнасці электразабеспячэння;
- выключыць вывад у планавы рамонт рэзервовых КЛ, ВЛ і іншага электраабсталявання ў перыяд паводкі;
- праверыць асвятленне ў ТП, РП, ВРУ, пры неабходнасці аднавіць яго;
- прызначыць персанал для вядзення аварыйна-аднаўленчых работ і правесці з ім проціаварыйныя трэніроўкі;
- забяспечыць наяўнасць аварыйных запасаў матэрыяльна-тэхнічных сродкаў.
Пры атрыманні інфармацыі аб наступленні паводкі неабходна абясточыць электраабсталяванне аб'екта, па магчымасці эвакуіраваць абсталяванне і матэрыяльныя каштоўнасці на верхнія паверхі, дзе яны будуць у зоне недасяжнасці паводкавых вод.
Забараняецца падаваць напружанне на электраабсталяванне адразу пасля таго, як паводка скончыцца. Перад іх запускам неабходна дачакацца іх поўнага высыхання.
Такім чынам, для таго, каб мінімізаваць негатыўныя наступствы ў перыяд паводкі, на тэрыторыі прадпрыемства неабходна праводзіць падрыхтоўчыя мерапрыемствы, а таксама інструктаваць работнікаў аб іх дзеяннях падчас паводкі і пасля яе.
Аб любых няспраўнасцях у сетках электразабеспячэння паведамляйце дыспетчару Верхнядзвінскага РЭС па нумары 5-32-41, 5-30-84 і да прыбыцця брыгады не набліжайцеся да электраабсталявання бліжэй 8 метраў і арганізуйце ахову месца пашкоджання для прадухілення набліжэння старонніх асоб.
Начальнік Верхнядзвінскай
раённай энергагазінспекцыі А.Г. Андрэеў