Сёння, 27 верасня, па ўсёй краіне Дзяржаўтаінспекцыя правядзе Адзіны дзень бяспекі дарожнага руху пад дэвізам "Не будзь нябачнікам - засвяціся ў цемры!".

Супрацоўнікі ДАІ наведаюць працоўныя калектывы і ўстановы адукацыі, дзе нагадаюць правілы бяспечных паводзін у цёмны час сутак, растлумачаць неабходнасць і правілы выкарыстання святлоадбівальных элементаў і адзення павышанай бачнасці.

 

Пешаход пры руху па краі праезнай часткі або абочыне ў цемры павінен выкарыстоўваць святлоадбівальныя элементы. Абазначыць сябе ў цёмны час сутак павінны таксама веласіпедысты і асобы на сродках персанальнай мабільнасці.

Кіроўцам важна праяўляць павышаную ўвагу пры праездзе пешаходных пераходаў і руху па трасах паблізу населеных пунктаў, выконваць хуткасныя абмежаванні і правілы манеўравання.

У пятніцу і выхадныя Дзяржаўтаінспекцыя ўзмоцніць кантроль на дарогах і прыме дадатковыя меры па забеспячэнні бяспекі ўразлівых удзельнікаў дарожнага руху.

Павышаная ўвага будзе нададзена адпрацоўцы аварыйна-небяспечных участкаў дарог.