Верхнядзвінская каманда – прызёр маладзёжнага беларуска-расійскага адукацыйна-патрыятычнага лагера «Курган Дружбы-2024»

Трэці раз на мяжы Беларусі, Расіі і Латвіі прайшоў моладзевы беларуска-расійскі адукацыйна-патрыятычны лагер «Курган-2024».

Ужо 65 гадоў народы краін-суседак аб'ядноўвае свяшчэнная традыцыя, паводле якой у першую нядзелю ліпеня былыя франтавікі, партызаны і падпольшчыкі, іх родныя, знаёмыя і проста неабыякавыя людзі збіраюцца на Кургане Дружбы, каб ушанаваць памяць загінулых у гады Вялікай Айчыннай вайны і аддаць даніну павагі героям, якія прынеслі мір на нашы землі. Але час імкліва ляціць, пакаленне пераможцаў сыходзіць – і доўг захоўваць спадчыну мінулых гадоў перадаецца моладзі, якая закладвае новыя, ужо свае ўласныя традыцыі.
Трэці год запар напярэдадні сустрэчы на Кургане Дружбы разгортваецца моладзевы беларуска-расійскі адукацыйна-патрыятычны лагер «Курган-2024». У гэты раз ён прысвячаўся 80-годдзю вызвалення Беларусі ад нямецка-фашысцкіх захопнікаў. Удзел у конкурснай праграме лагера прынялі 23 каманды – зборныя раёнаў і гарадоў Віцебскай вобласці, а таксама Расійскай Федэрацыі, куды ўвайшлі прадстаўнікі Пскоўскай вобласці і Санкт-Пецярбурга. Прыехала на Курган і яшчэ адна дасведчаная каманда – зборная ГА «Беларускі саюз ветэранаў вайны ў Афганістане». Усяго «Курган-2024» сабраў больш за 500 чалавек!

Удзельнікаў лагера чакала насычаная праграма: штодзённая «#Народная Зарядка», конкурс патрыятычных песень і вершаў «Беларусь Памятае!», чэмпіянат па зборцы спілс-карт «Ведаю Беларусь», ваенна-спартыўная гульня «Паўночны рэгіён», інтэлектуальны турнір «Кветкі Вялікай Перамогі», агляд тэматычнага афармлення лагераў, урокі мужнасці, праца разнастайных адукацыйных пляцовак і многае іншае – сумаваць не было калі. Але самае галоўнае, дзеля чаго маладыя людзі на тры дні забыліся пра звыклы камфорт і пасяліліся ў палатках удалечыні ад гарадской мітусні, – гэта зносіны. Сустрэчы старых сяброў і новыя знаёмствы, азарт спаборніцтва і абмен вопытам, песні ля вогнішча і салдацкая каша з тушонкай – усё гэта пакідае незгладжальныя ўражанні і жаданне вярнуцца ў лагер у наступным годзе.
Каманда Верхнядзвінскага раёна заняла першае месца ў інтэлектуальным турніры «Кветкі Вялікай Перамогі», дзе паказала веды, логіку і ўменне хутка прымаць рашэнні ў «Сваёй гульні», «Што? Дзе? Калі?» і «Брэйн-рынгу».

Атрымаўшы перамогу ў гіравым спорце і перацягванні каната, верхнядзвінцы заваявалі выніковае другое месца ў ваенна-спартыўнай гульні «Паўночны рэгіён». Удалося ўвайсці ў тройку лідараў і ў конкурсе палявых газет. У выніку Верхнядзвінскі раён заняў другое агульнакаманднае месца па выніках конкурснай праграмы лагера, саступіўшы ўсяго два балы Сянненскаму раёну. Трэцімі сталі прадстаўнікі Аршаншчыны.
7 ліпеня моладзь і воіны-афганцы прынялі ўдзел у юбілейнай 65-й сустрэчы на Кургане Дружбы. А на тэрыторыі лагера традыцыйны Вогнішча Дружбы запалілі прадстаўнікі адразу трох пакаленняў: удзельнікі Міжнароднага сацыяльнага праекта «Грамадзянска-патрыятычны лагер «Курган Дружбы», лідары маладзёжнага беларуска-расійскага адукацыйна-патрыятычнага лагера «Курган-2024» з Сянненскага раёна і старшыня Віцебскага аблвыканкама Аляксандр Субоцін.
Алена МАРОЗ.

Крыніца: d-p.by