У Віцебску да ўборкі снегу прыцягнуты дадатковыя сілы ЖКГ

Каля 350 чалавек і больш за 50 адзінак спецтэхнікі агулам задзейнічаны ў Віцебску на ўборцы снегу, які накрыў горад гэтай ноччу. Пра гэта паведамілі ў ЖРЭТ Віцебска і ГП "Гардармост".

Абласны цэнтр апынуўся ў палоне цыклону, нечаканага для першага вясновага месяца. Тым не менш камунальныя службы рана раніцай, а некаторыя і ўночы, пачалі расчыстку снегу, пры гэтым прыцягваюцца дадатковыя рэзервы. І наперадзе ў іх падоўжаны працоўны дзень, бо па прагнозе снег будзе ісці да позняга вечара – прыкладна да 23.00.

Ужо з 6 гадзін раніцы ўсе дворнікі, якія ёсць у штаце ЖРЭТ, і дадатковыя сілы адпраўлены на расчыстку снегу. Каля 270 чалавек задзейнічаны на ўборцы дваравых тэрыторый. Ім у дапамогу накіраваны 20 адзінак снегаўборачнай тэхнікі.

Што тычыцца вуліц Віцебска, то, як расказалі карэспандэнту БЕЛТА на прадпрыемстве "Гардармост" Віцебска, тут ужо ў начны час расчышчалі снег каля 35 адзінак тэхнікі – па праезнай частцы ішлі аўтакалоны. Таксама прадпрыемства накіравала каля 80 чалавек на расчыстку тратуароў. Праца ўскладняецца тым, што снег цяжкі – учора ўвечары ён быў мокры, а цяпер утварылася галалёдзіца. Снег працягвае ісці, і ўжо за гадзіну на расчышчаных месцах утвараюцца новыя заносы. Работнікі прадпрыемства будуць працаваць сёння ва ўзмоцненым рэжыме. Жыхароў абласнога цэнтра просяць з разуменнем аднесціся да працы камунальных службаў, а аўтамабілістаў заклікаюць не абганяць снегаўборачныя аўтакалоны.

Віцяблянам варта быць асцярожнымі і пры перасячэнні нерэгуляваных пешаходных пераходаў, асабліва калі снег ідзе шчыльнай сцяной. Дзяржаўтаінспекцыя нагадвае, што ў няпростых умовах надвор'я аўтамабілю цяжэй спыніцца на пакрытым снегам або аблядзянелым дарожным палатне, таму пешаходам важна праявіць пільнасць і не спяшацца на пераходах. Таксама супрацоўнікі ДАІ рэкамендуюць пазначаць сябе святлоадбівальнымі элементамі, каб кіроўцы змаглі своечасова затармазіць. Інспектары ДПС будуць аказваць дапамогу аўтамабілістам, якія трапілі ў складаную сітуацыю на дарогах. Усіх, хто сутыкнуўся з пазаштатнай сітуацыяй, просяць паведамляць па нумары 102.

Крыніца: vitebsk-region.gov.by