Гісторыі родных людзей і мясцін. Пра што яшчэ расказалі ўдзельнікі дзіцячых партызанскіх чытанняў
У Нацыянальным архіве праходзяць дзіцячыя партызанскія чытанні ў рамках акцыі "Архівы – школам", перадае карэспандэнт БЕЛТА.
Намеснік дырэктара Нацыянальнага архіва, кандыдат гістарычных навук Святаслаў Кулінок распавёў, што ідэя правядзення дзіцячых партызанскіх чытанняў узнікла летась. "У год 80-годдзя вызвалення Беларусі мы захацелі зрабіць мерапрыемства, якое дазволіла б стымуляваць цікавасць да гераічнай гісторыі ў маладога пакалення. Мы падумалі, што архіў – гэта пляцоўка, дзе дзеці змогуць рэалізаваць свае даследчыя праекты. У рамках гэтай канферэнцыі многія прыходзілі сюды і працавалі з першакрыніцамі, сапраўднымі дакументамі, каб напісаць працы. Наша галоўная задача – выхаваць у школьніках і навучэнцах пачуццё патрыятызму. Прыемна адзначыць, што канферэнцыя расце як у плане колькаснага складу, так і геаграфічна. Калі летась удзельнічалі навучэнцы мінскіх школ, то сёлета прыехалі ўжо дзеці з рэгіёнаў і абласцей. Праект выйшаў на міжнародны фармат: да нас далучыліся школьнікі з Пермі, Екацярынбурга, Петразаводска", – распавёў ён.
Дырэктар Дэпартамента па архівах і справаводстве Міністэрства юстыцыі Алег Войнаў дадаў, што сёлета колькасць удзельнікаў чытанняў узрасла амаль на 50%.
Калі былі сабраны заяўкі, арганізатараў парадавала, што трэць дакладаў была прысвечана сямейным гісторыям. "Гэта выдатна, бо любая гісторыя пачынаецца са сваёй сям'і, малой радзімы. У дзяцей з'явілася магчымасць дадаткова вывучыць лёсы сваіх блізкіх, расказаць пра гэта сваім аднагодкам", – адзначыў Святаслаў Кулінок.
Навучэнка гімназіі Фаніпаля імя А.І. Гурына Ясмін Наср прадставіць даклад пра свайго прадзеда. "Ідэя даследавання з'явілася пасля таго, як мы ляталі да бабулі на Урал. Там мы ўбачылі фатаграфію, пачалі шукаць інфармацыю пра дзядулю ў архівах і інтэрнэце. Удалося сабраць звесткі пра яго баявы шлях. Ён быў паранены і прайшоў да канца вайны. Для мяне было важна захаваць памяць", – падзялілася ўдзельніца.
З гэтай жа гімназіі ў канферэнцыі ўдзельнічае дзесяцікласніца Анастасія Максіменка. Яе праца "Генацыд беларускага народа" – пра злачынствы фашыстаў на землях роднага Дзяржынскага раёна. "У Дзяржынскім раёне цалкам або часткова спалены 84 вёскі, з іх тры паўтарылі лёс Хатыні. Людзі ваявалі, прайшлі вельмі цяжкі шлях дзеля таго, каб у нас было такое жыццё, як цяпер. Будучым пакаленням трэба памятаць пра гэта", – упэўнена яна.
Навучэнец Мінскага дзяржаўнага
Дырэктар каледжа лічбавых тэхналогій Уладзімір Дзядзічэнка на канферэнцыі раскажа пра сваіх сваякоў. "Мае тры прадзеды - пісьменнік, партызан і чырвонаармеец. Лічу, што без мінулага няма сучаснасці, трэба ведаць яго, каб ісці далей", - падкрэсліў ён.
Канферэнцыя стала лагічным працягам серыі мерапрыемстваў, якія былі праведзены ў архіўнай галіне ў год 80-годдзя Перамогі. У 2025 годзе былі выдадзены дзве кнігі аднайменнай серыі "Партызанскі архіў": "Партызанскі побыт" і "Жанчыны ў партызанскім руху Беларусі". Гэтая серыя будзе працягнута і ў 2026 годзе. У верасні прайшла другая міжнародная канферэнцыя "Партызанскі архіў".