Механізатары ААТ «Маяк-Высокае» першымі ў Віцебскай вобласці намалацілі па тысячы тон збожжа
Механізатары ААТ «Маяк-Высокае» Аршанскага раёна, родныя браты Дзяніс і Яўген Пшонныя першымі ў Віцебскай вобласці намалацілі па тысячы тон збожжа.
Рубеж узяты на азімай пшаніцы, ураджайнасць якой, нягледзячы на складаныя ўмовы надвор'я, аказалася вышэй за леташнюю. Дзяніс стаў першым «тысячнікам» Прыдзвіння, а Яўген – лідарам у моладзевай намінацыі.
Павіншаваў «тысячнікаў» прама ў полі старшыня Віцебскага аблвыканкама Аляксандр Субоцін.
– Самае галоўнае – гэта нашы людзі, якія гатовыя і ўмеюць працаваць. Яны чакаюць кожную хвіліну, кожную тону «выхопліваюць» у надвор'я. Цяпер яно ўсталявалася сонечнае, і гэта – акно магчымасцей, каб кінуць усе сілы на бітву за ўраджай. Вось ужо два «тысячнікі». У цяперашні няпросты сезон гэта можна запісаць як працоўны подзвіг. Цяпер задача – нарошчваць тэмп, сабраць збожжа з палёў, высушыць і пакласці на захоўванне.
Аляксандр Субоцін адзначыў, што сёлета віды на ўраджай у вобласці добрыя.
Старшыня Аршанскага райвыканкама Ігар Мароз распавёў, што ў цэлым ураджай на палях рэгіёна радуе.
– Больш за 45 ц/га сярэдняя ўраджайнасць азімых збожжавых. 20% азімых збожжавых культур на сённяшні дзень ужо ў засеках. Надвор'е ўсталявалася, набіраем тэмп. Калектывы сельгаспрадпрыемстваў «зараджаны». Усе кіраўнікі разумеюць узровень адказнасці. Мы сваю задачу выканаем, – выказаў упэўненасць кіраўнік рэгіёну.
Падзяліўся сваім сакрэтам поспеху Дзяніс Пшонны. Гэты ўборачны сезон за штурвалам камбайна ў перадавіка – другі па ліку.
– Усё справа ў жаданні працаваць, – падкрэсліў ён. – Мы настроены на тое, што хлеб убяром у найкароткія тэрміны і без страт. Безумоўна, перажываў, што надвор'е падводзіць. І справа не ў тым, што спяшаўся дабрацца да тысячы: не хацелася страціць ні аднаго каласка.
У маладога механізатара Яўгена Пшоннага гэтая ўборачная кампанія – шостая. Летась ён пераступіў тысячны рубеж другім у вобласці. А сёлета стаў лідарам жніва сярод маладых экіпажаў.
– Гэта матывуе! Складанасцей няма: тэхніка не падводзіць, кіраўніцтва разумеючае, зарплата высокая. Самае галоўнае – імкненне працаваць і азарт.
Уборка ў самым разгары, наперадзе ў аграрыяў вобласці новыя рэкорды.