У Віцебску адзначылі 81-ю гадавіну вызвалення горада ад нямецка-фашысцкіх захопнікаў
У дзень 81-й гадавіны вызвалення Віцебска ад нямецка-фашысцкіх захопнікаў да Вечнага агню на плошчы Перамогі былі ўскладзены вянкі і кветкі.
У цырымоніі прынялі ўдзел кіраўнікі горада, прадстаўнікі працоўных калектываў, устаноў адукацыі, грамадскіх арганізацый.
На ўрачыстым мітынгу старшыня Віцебскага гарвыканкама Аляксей Героеў адзначыў, што святкаванне Дня горада звязана з адной з самых важных дат у яго гісторыі – 26 чэрвеня 1944 года. Вызваленню ад нямецка-фашысцкіх захопнікаў папярэднічалі тры гады прыгнёту, голаду, гвалту, катаванняў і знявагі. З першых жа дзён фашысты ўстанавілі крывавы парадак, асуджаючы жыхароў на выміранне. Многія сталі ахвярамі халакосту і генацыду. У Віцебску было створана пяць лагераў смерці, самы вядомы – 5-ы полк стаў брацкай магілай для больш чым 80 тыс. чалавек. Віцябляне былі выкрадзены на прымусовыя работы ў Германію, адпраўлены вагонамі ў канцлагеры краін Еўропы. З сутарэнняў нямецкага гестапа штодня даносіліся крыкі болю і пакуты. Па няпоўных даных, толькі з ліпеня па снежань 1942-га праз казематы турмы СД прайшло больш за 3 тыс. чалавек.
Нягледзячы на моц нямецкай ваеннай машыны, на тэрор і масавыя забойствы, гараджане ні на хвіліну не гублялі веру ў Перамогу. Першыя падпольныя групы пачалі стварацца ўжо ў ліпені 1941 года. Віцебскія патрыёты ўстанаўлівалі сувязі і дапамагалі партызанам і спецыяльным разведгрупам, ратавалі моладзь ад выкрадання на катаржныя работы, здзяйснялі дыверсіі на чыгунцы і аэрадроме.