У Віцебску адзначылі Дзень памяці воінаў-інтэрнацыяналістаў
Дата 15 лютага 1989 года, калі апошнія часткі савецкіх войскаў выйшлі з Афганістана, упісана ў гісторыю краіны як радасны і смутны дзень. Гэта свята са слязамі на вачах, якія не асушылі мінулыя дзесяцігоддзі.
Кожны год у марозны лютаўскі дзень людзі прыходзяць да мемарыяла на вуліцы Воінаў-інтэрнацыяналістаў. Вельмі сімвалічная назва помніка – «Боль». З болем у сэрцы ўспамінаюць ветэраны пра перажытае, моцныя мужчыны, якія прайшлі страшныя выпрабаванні, з цяжкасцю стрымліваюць камяк у горле.
– Для нас афганская вайна – гэта гонар і боль. Гордасць за тое, што мы з гонарам выканалі свой абавязак, годна рабілі мужчынскую працу. І гэта адзначана дзяржаўнымі ўзнагародамі. Два ўраджэнцы Віцебшчыны – Васіль Шчарбакоў і Васіль Піменаў – удастоены высокага звання Героя Савецкага Саюза. А боль за страту сяброў. У Афганістане загінулі 160 нашых землякоў і каля 1,5 тысячы чалавек, якія вярнуліся на Радзіму, пайшлі з жыцця з-за наступстваў вайны. Сёння мы схіляем галовы перад маці і ўдавамі, – адзначыў старшыня абласной арганізацыі Беларускага саюза ветэранаў вайны ў Афганістане падпалкоўнік у адстаўцы Валерыян Мацкевіч.