Інвестар з Расіі набыў былы вінаробны завод на вуліцы Пакроўскай у Віцебску
Пляцоўка былога вінаробнага завода па вуліцы Пакроўскай, 7 у Віцебску была адным з найбуйнейшых вытворчых аб'ектаў Віцебскай вобласці, які пуставаў ужо больш за 7 гадоў.
Комплекс будынкаў вінаробнага завода размешчаны ў гістарычнай частцы горада, у раёне, дзе калісьці жыў Шагал.
Аналіз архіўных дакументаў сведчыць, што Віцебскі вінзавод быў утвораны на аснове існаваўшага на гэтым месцы прадпрыемства па вытворчасці алею. У 1898 годзе з дазволу губернскага праўлення ніжненгародскі купецкі сын Лейба Шмеркаў Мнухін і віцебскі купец Абрам Лейбаў Свердлін пабудавалі завод з цэглы з паравой устаноўкай для вытворчасці расліннага алею з каноплянага, ільнянога і іншага насення.
Падчас пажару, які адбыўся 13 красавіка 1904 года, два будынкі згарэлі. У адным быў паравы кацёл, а ў другім склад насення. Пасля будынкі былі адноўлены.
Неабходна адзначыць, што на працягу 1913 – 1915 гадоў мясцовыя жыхары неаднаразова скардзіліся ў губернскае праўленне на ўладальнікаў завода Мнухіна і Свердліна, што гул машын, пах, атрутны газ парушаюць цішыню і спакой у акрузе, іскры, якія вылятаюць з трубы дызельнага рухавіка, могуць стаць прычынай чарговага пажару.
Пасля маслазавод быў пераабсталяваны ў вінаробны. Да Вялікай Айчыннай вайны тут выраблялася 100 тысяч дэкалітраў віна, 50 тысяч дэкалітраў сокаў, 20 тон экстракту, 200 тон павідла. Завод працаваў нават падчас нямецкай акупацыі – выраблялася невялікая колькасць віна і вады.
У пасляваенныя гады вытворчыя магутнасці былі значна павялічаны – у год выраблялася 150 тысяч дэкалітраў пладова-ягаднага віна і 100 тысяч дэкалітраў вінаграднага віна.
Да нашых дзён адміністрацыйна-гаспадарчы будынак захаваўся са значнай стратай гістарычнага выгляду. Асноўныя змены адбыліся ў пасляваенны час. Пасля рэканструкцыі тут з'явіліся кантора, клуб і сталовая. Будынак з'яўляецца прыкладам грамадзянскай забудовы Віцебска канца 19 – пачатку 20 стагоддзя.
Пасля ліквідацыі вінаробнага завода ў 2017 годзе ўласнасцю дзяржавы застаўся невыкарыстоўваны комплекс аб'ектаў, які ўключае адміністрацыйны будынак, які мае статус аб'екта гісторыка-культурнай каштоўнасці 3-й катэгорыі.
Таксама тут размешчаны два вытворчыя корпусы, цэх аўсянага печыва, вінаховішча, спіртаховішча, склад, прахадная, маюцца інжынерныя сеткі. Агульная плошча капітальных пабудоў складае больш за 5000 кв.м.
За мінулыя гады віназавод 12 разоў безвынікова выстаўляўся на аўкцыён ‒ пакупнікоў не знаходзілася.
25 лістапада аб'ект быў паўторна выстаўлены на аўкцыён, са зніжэннем цаны продажу ўжо на 80%. У выніку, за 462 тысячы рублёў, былы вінаробны завод набыў інвестар з Расійскай Федэрацыі.