Рэстаўрацыя Спаса-Праабражэнскай царквы ў Полацку завершыцца ў 2024 годзе
Рэстаўрацыя Спаса-Праабражэнскай царквы ў Полацку завершыцца ў 2024 годзе. Пра гэта сёння, у Міжнародны дзень культуры і напярэдадні Міжнароднага дня помнікаў і гістарычных мясцін, паведаміў кансультант аддзела аховы і ўліку гісторыка-культурных каштоўнасцей упраўлення па ахове гісторыка-культурнай спадчыны Міністэрства культуры Генадзь Хадор.
"У 2024 годзе практычна ў кожнай вобласці вядуцца маштабныя работы на знакавых аб'ектах спадчыны. У Брэсцкай вобласці гэта аднаўленне усходняга корпуса Палацава-паркавага комплексу Сапегаў у Ружанах. У Мінскай вобласці плануецца завяршыць рэстаўрацыйныя работы на касцёле Божага Цела ў Нясвіжы, а таксама ўвесці ў эксплуатацыю былую сінагогу ў Валожыне. У Віцебскай вобласці плануюць завяршыць работу на Спаса-Праабражэнскай царкве ў Полацку, а ў Гомельскай вобласці выдзелены сродкі на правядзенне работ у жылым корпусе былога калегіума езуітаў у аграгарадку Юравічы. У мінулым годзе ў Магілёўскай вобласці быў уведзены ў эксплуатацыю Палацава-паркавы ансамбль у Жылічах. Сёлета там вырашылі добраўпарадкаваць парк, каб прыцягнуць больш турыстаў. У Гродзенскай вобласці працягваюцца работы на такім знакавым аб'екце, як Крэўскі замак, а ў сталіцы ў 2024 годзе плануецца завяршыць работы на кінатэатры "Перамога" і храме Аляксандра Неўскага", - распавёў Генадзь Хадор.
Паводле яго слоў, сёння ў Дзяржаўным спісе гісторыка-культурных каштоўнасцей знаходзіцца 5685 каштоўнасцей, у тым ліку 181 нематэрыяльная гісторыка-культурная каштоўнасць, 138 рухомых матэрыяльных гісторыка-культурных каштоўнасцей, 5366 нерухомых матэрыяльных гісторыка-культурных каштоўнасцей.
"Сярод важных напрамкаў у ахове гісторыка-культурнай спадчыны можна вылучыць два - гэта захаванне таго, што ўключана ў Дзяржаўны спіс гісторыка-культурных каштоўнасцей, і выяўленне новых аб'ектаў для надання ім адпаведнага статусу і ўключэння ў Дзяржаўны спіс гісторыка-культурных каштоўнасцей. Аднак сярод работ па захаванні асаблівую ўвагу дзяржава надае аб'ектам, якія знаходзяцца ў нездавальняючым стане. У нас такіх аб'ектаў парадку 280. З 2022 года распрацаваны і рэалізуюцца планы аблвыканкамаў і Мінгарвыканкама па пакрокавых дзеяннях у дачыненні да кожнага аб'екта, які знаходзіцца ў нездавальняючым стане. Адпаведна, на ўзроўні мясцовых бюджэтаў надаецца ўсялякая ўвага таму, каб такія аб'екты былі як мінімум адноўлены, закансерваваны, уцягнуты ў гаспадарчы або турыстычны абарот. За 2022-2023 гады ў гаспадарчы і турыстычны абарот уцягнута 37 помнікаў архітэктуры, у прыватнасці 14 аб'ектаў у 2022 годзе і 23 аб'екты ў 2023 годзе. Сёлета праца будзе працягвацца. Мы чакаем, што прыкладна такую ж колькасць аб'ектаў будзе ўцягнута ў турыстычны і гаспадарчы абарот", - дадаў Генадзь Ходар.
"Я лічу, што гэта напрамак заўсёды быў вельмі важным. А ў кантэксце новаўвядзення ў Канстытуцыю Рэспублікі Беларусь 2022 года ў Кодэксе аб культуры з'явіліся нормы аб захаванні гістарычнай памяці народа. Мне здаецца, што гісторыка-культурная спадчына (як матэрыяльная, так і духоўная, нематэрыяльная) з'яўляецца залогам і асновай беларускай дзяржаўнасці. Калі ў нас не будзе шматтысячных доказаў нашай гісторыі і ідэнтычнасці (помнікаў, замкаў, палацаў, сядзіб, храмаў, захаваных абрадаў і традыцый, якія каранямі сыходзяць у тысячагадовую гісторыю беларускага народа), то не будзе і такой галоўнай асновы беларускай ідэнтычнасці, як сама культура. Гісторыка-культурная спадчына, культура - гэта сапраўды знакавы код нацыі, таму дзяржава сёння вельмі ўважліва ставіцца да гэтага напрамку і заўсёды падкрэслівае, што захаванне гісторыка-культурнай спадчыны - адзін з прыярытэтных напрамкаў дзяржаўнай палітыкі ў сферы культуры. Выбудавана цэлая сістэма, якая дапамагае
т не толькі захоўваць нашы помнікі і традыцыі, але і прымнажаць іх для будучых пакаленняў", - падсумаваў Генадзь Ходар.
Крыніца: vitebsk-region.gov.by