Падрыхтоўку і правядзенне Форуму рэгіёнаў Беларусі і Расіі абмеркавалі ў аблвыканкаме

Як адзначыў кіраўнік вобласці Аляксандр Субоцін, для Віцебшчыны вялікі гонар прымаць такое маштабнае мерапрыемства, і яно павінна прайсці на высокім узроўні. Нямалае значэнне мае і тое, што дзякуючы форуму будзе палепшана інфраструктура рэгіёна, і ўсё зробленае застанецца жыхарам.

Старшыня абласнога Савета дэпутатаў Дзмітрый Дзямідаў расказаў, што дэлегацыя Федэральнага Сходу Расійскай Федэрацыі, якая прыязджала ў Беларусь і наведала аб'екты будучага форуму, высока ацаніла прапанаваную канцэпцыю мерапрыемства і правядзенне яго адразу ў трох гарадах.

Форум пройдзе 26 і 27 чэрвеня. У ім мяркуюць прыняць удзел прэзідэнты Уладзімір Пуцін і Аляксандр Лукашэнка. Чакаецца вялікая колькасць гасцей, у тым ліку кіраўнікоў рэгіёнаў Беларусі і Расіі. У праграме – выставы, пленарнае пасяджэнне, праца дзевяці секцый.

– Будуць задзейнічаны шматлікія пляцоўкі Віцебска, Полацка і Наваполацка. Усе яны будуць тэматычнымі. У прыватнасці, на плошчы Свабоды ў абласным цэнтры разгорнецца выстава тэхнікі прамысловых прадпрыемстваў Беларусі і Расіі. Вакол канцэртнай залы «Віцебск» рэгіёны дзвюх краін прадставяць свой патэнцыял народных дасягненняў. Каля Летняга амфітэатра выставачны праект будзе прысвечаны інавацыйнаму развіццю – тэме, якая будзе абмяркоўвацца на форуме. Прыцягне ўвагу тэматычная пляцоўка кухняў Беларусі і Расіі. На вуліцах Замкавай і Суворава разгорнуцца рамеснікі. Адбудуцца розныя відовішчныя мерапрыемствы. Зацікаўленая размова адбудзецца на пасяджэннях тэматычных секцый. Так, на ААТ «Віцебскія дываны» пойдзе размова пра інавацыйнае развіццё ў лёгкай прамысловасці. На заводзе «Палімір» ААТ «Нафтан» прадстаўнікі расійскага і беларускага бізнесу абмяркуюць інавацыі ў прамысловым комплексе. Будуць узняты і іншыя тэмы ў рамках супрацоўніцтва ў розных сферах, – патлумачыла намеснік старшыні аблвыканкама Анжаліка Нікіціна.

Анжаліка Нікіціна таксама адзначыла, што на форуме прадугледжваецца падпісанне новых дагавораў. На сённяшні дзень Віцебскі аблвыканкам заключыў 28 пагадненняў аб супрацоўніцтве з расійскімі рэгіёнамі. Да маючага адбыцца форуму ўжо пададзена пяць заявак з боку Расійскай Федэрацыі, у прыватнасці ад Кемераўскай, Свярдлоўскай абласцей, Карэліі.

На нарадзе дэталёва абмеркавалі ход будаўнічых работ, добраўпарадкаванне, гатоўнасць гасцініц, грамадскага харчавання да прыёму вялікай колькасці гасцей, арганізацыю культурнай праграмы.

– Так супала, што некалькі найважнейшых мерапрыемстваў пройдуць адначасова: форум рэгіёнаў, 1050-годдзе з дня заснавання Віцебска, 80-годдзе вызвалення абласнога цэнтра, а затым – «Славянскі базар». Трэба будзе напружаная праца. Але і надалей трэба не расслабляцца і не зніжаць тэмп. Гэта пойдзе на карысць Віцебшчыне і краіне, – падкрэсліў Аляксандр Субоцін.

Крыніца: vitebsk-region.gov.by