У Віцебскай вобласці зацверджаны саставы абласной і акруговых выбарчых камісій па выбарах дэпутатаў у адзіны дзень галасавання

7 снежня адбылося сумеснае пасяджэнне прэзідыума Віцебскага абласнога Савета дэпутатаў і Віцебскага аблвыканкама, парадкам дня якога было «Стварэнне выбарчых камісій па выбарах дэпутатаў у адзіны дзень галасавання 25 лютага 2024 г.».

– На пасяджэнне запрошаны кіраўнікі камітэтаў, упраўленняў і аддзелаў аблвыканкама і абласных арганізацый, прадстаўнікі палітычных партый і іншых грамадскіх аб'яднанняў, прафесійных саюзаў, якія вылучылі сваіх прадстаўнікоў у склад абласной і акруговых выбарчых камісій, – адзначыў, адкрываючы пасяджэнне, старшыня аблвыканкама Аляксандр Субоцін. – Нам неабходна разгледзець пытанне стварэння Віцебскай абласной і акруговых выбарчых камісій.

Адзначыўшы, што ў нашай краіне будзе праводзіцца адзіны дзень галасавання, Аляксандр Субоцін падкрэсліў, што гэта дазволіць пазбегнуць перманентнага выбарчага працэсу, які ствараў пэўныя складанасці для дзяржавы і для грамадства. Яшчэ да старту выбарчай кампаніі органамі мясцовага кіравання і самакіравання вобласці была праведзена скрупулёзная падрыхтоўчая праца па вызначэнні колькасці і межаў выбарчых акруг, сярэдняй колькасці выбаршчыкаў на акругу.
– Сёння нам трэба вырашыць адно з ключавых пытанняў: аб стварэнні Віцебскай абласной і акруговых выбарчых камісій, – акцэнтаваў кіраўнік абласной улады. – Гэта рашэнне павінна быць узважаным і адказным. Бо гэтыя камісіі не толькі арганізуюць правядзенне выбараў, але і ажыццяўляюць кантроль за выкананнем выбарчага заканадаўства ў нашым рэгіёне. Склады камісій павінны быць падабраны па сваіх дзелавых, маральных і чалавечых якасцях такім чынам, каб паўнамоцтвы камісій былі рэалізаваны ў поўным аб'ёме і ў тэрміны, вызначаныя Каляндарным планам па выбарах.
5 снежня завяршылася вылучэнне ў склад абласной і акруговых выбарчых камісій. Усе суб'екты, якія валодаюць у адпаведнасці з Выбарчым кодэксам правам вылучаць сваіх прадстаўнікоў у склад абласной і акруговых выбарчых камісій, скарысталіся ім.

Старшыня абласнога Савета дэпутатаў Уладзімір Церанцьеў нагадаў, што пастановай ЦВК на тэрыторыі Віцебскай вобласці ўтворана 14 выбарчых акруг па выбарах дэпутатаў Палаты прадстаўнікоў Нацыянальнага сходу Рэспублікі Беларусь 8-га склікання. Віцебскім абласным Саветам дэпутатаў утворана 60 выбарчых акруг па выбарах дэпутатаў абласнога Савета дэпутатаў. Па новым выбарчым заканадаўстве выбары дэпутатаў Палаты прадстаўнікоў і абласнога Савета праводзяць адны і тыя ж акруговыя камісіі.

– У склад Віцебскай абласной выбарчай камісіі вылучана 13 чалавек, з іх палітычнымі партыямі і іншымі грамадскімі аб'яднаннямі – 11 чалавек (85%), у тым ліку палітычнымі партыямі – 3 чалавекі (23%). Працоўнымі калектывамі 2 чалавекі (15%). Усяго ў склад 14 акруговых выбарчых камісій вылучана 182 чалавекі, з іх палітычнымі партыямі і іншымі грамадскімі аб'яднаннямі 141 чалавек (77%), у тым ліку палітычнымі партыямі 22 чалавекі (12%), працоўнымі калектывамі – 4 чалавекі (2%). Шляхам збору подпісаў – 37 чалавек (20%).
Абласная і акруговыя выбарчыя камісіі ўтвараюцца ў колькасці ад 9 да 13 членаў. Члены аблвыканкама і прэзідыума абласнога Савета дэпутатаў прагаласавалі за лікавы склад камісій у складзе 13 чалавек.

Крыніца: vitebsk-region.gov.by