Навукова-адукацыйны кластар зьявіўся ў Віцебску
Дагавор аб стварэнні кластара «Медыцына і фармацыя – інавацыйныя праекты» падпісаны паміж Віцебскім дзяржаўным медыцынскім універсітэтам, абласным цэнтрам маркетынгу, Віцебскім дзяржаўным універсітэтам, Віцебскай дзяржаўнай акадэміяй ветэрынарнай медыцыны, Віцебскім дзяржаўным тэхналагічным універсітэтам, Полацкім дзяржаўным універсітэтам, інкубатарам малога прадпрымальніцтва «Закон і Парадак», Віцебскім прадпрыемствам «Фармацыя» і ТАА «ВитВар». Арганізацыяй-каардынатарам кластара з'яўляецца ВДМУ.
4 снежня дагавор аб стварэнні новага аб'яднання падпісалі кіраўнікі навучальных устаноў і прадпрыемстваў. У урачыстым мерапрыемстве прынялі ўдзел намеснік старшыні аблвыканкама Вячаслаў Дурноў і намеснік старшыні Віцебскага гарвыканкама Віктар Глушын.
– Кластар ствараецца пры падтрымцы аблвыканкама і Міністэрства аховы здароўя Беларусі, – падкрэсліў падчас мерапрыемства Вячаслаў Дурноў. – Для Віцебскай вобласці вельмі важна, каб выконваліся комплексныя навуковыя праекты, накіраваныя на прыцягненне інвестыцый і новых тэхналогій, распрацоўкі новых адукацыйных праграм, якія адпавядаюць патрэбам сучаснага рынку працы. Спадзяёмся, што аб'яднанне намаганняў у рамках кластара вывядзе на новы ўзровень развіццё медыцыны, фармацыі, ветэрынарнай вытворчасці, інфармацыйных тэхналогій, бізнес-працэсаў і іх прымяненне ў розных галінах эканомікі. Дзейнасць кластара будзе накіравана на стымуляванне інавацыйнага прадпрымальніцтва і камерцыялізацыю навуковых распрацовак, падтрымку стартапаў і малога бізнесу. Мае вялікае значэнне, што ў рамках кластара будзе пашырана магчымасць рэалізацыі патэнцыялу маладых вучоных і спецыялістаў, удасканаленне іх навыкаў і кампетэнцый. Сёння дагавор падпісваюць 9 арганізацый, але ў будучыні разлічваем на далучэнне да яго прамысловых прадпрыемстваў, навуковых цэнтраў, лабараторый, маркетынгавых арганізацый з Беларусі, а таксама блізкага і далёкага замежжа. Упэўнены, што навукова-адукацыйны кластар стане ключавым элементам інавацыйнай сістэмы Віцебскай вобласці і будзе спрыяць яе эканамічнаму развіццю і павышэнню канкурэнтаздольнасці. Мы робім сур'ёзны першы крок, а далей будзе вялікі шлях. Для гэтага ў нас ёсць патэнцыял, тэхналогіі, распрацаваныя на Віцебшчыне, ёсць моцныя прадпрыемствы ў галіне фармацыі, біятэхналогій.
Рэктар БДМУ Аляксей Чуканаў адзначыў, што да гэтай знакавай падзеі ішлі даўно, маючы велізарны навуковы і прамысловы патэнцыял.
– Аб'яднанне намаганняў дазволіць хутчэй і больш эфектыўна дасягнуць жаданага выніку, – сказаў рэктар БДМУ. – І гаворка не толькі пра вытворчасць нейкіх лекаў, прэпаратаў, але і ў цэлым пра трансфармацыю навуковых ідэй у практычнае рэчышча. Упэўнены, што неўзабаве да нас далучацца ўсе, хто зацікаўлены ў навуковым забеспячэнні сваіх распрацовак, укараненні ідэй у вытворчасць. Усіх нас віншую з першым крокам!
Крыніца: vitebsk-region.gov.by