Дэлегацыі з Узбекістана наведалі ўстановы аховы здароўя і медыцынскай адукацыі Віцебскай вобласці
Віцебская вобласць прымала дзве дэлегацыі з Узбекістана — удзельнікаў медыцынскага форуму «Дні аховы здароўя і медыцынскай адукацыі Узбекістан-Беларусь».
Прадстаўнікі сістэмы медадукацыі і практычнай аховы здароўя наведалі аналагічныя ўстановы Віцебскай вобласці.
Кіраўнікі ВНУ і тэхнікумаў грамадскага здароўя Узбекістана пазнаёміліся з падыходамі па падрыхтоўцы спецыялістаў вышэйшага і сярэдняга звяна ў Віцебскім дзяржаўным медыцынскім універсітэце і Віцебскім медыцынскім каледжы.
Віцебскі дзяржаўны ордэна Дружбы народаў медыцынскі ўніверсітэт ажыццяўляе супрацоўніцтва з многімі вядучымі замежнымі ВНУ ў галіне медыцынскай навукі, адукацыі і практычнай аховы здароўя. У прыватнасці, ва Узбекістане ў ВДМУ наладжана ўзаемадзеянне з установамі вышэйшай адукацыі медыцынскага профілю ў Бухары, Каршы, Тэрмезе і Самаркандзе. Сёння наладжаны новыя кантакты. Плануецца распрацоўка сумеснх праграм падрыхтоўкі субардынатараў, студэнцкія і выкладчыцкія абмены. Бакі перакананыя, што такое супрацоўніцтва дазваляе паскорыць абмен сучаснымі ведамі і тэхналогіямі, дапамагае развіццю наватарскіх форм медыцынскай адукацыі, навукі і аховы здароўя.
Медыкі-практыкі, кіраўнікі бальніц, клінік, тэрытарыяльных медыцынскіх аб'яднанняў цэнтральна-азіяцкай дзяржавы азнаёміліся з магчымасцямі аказання медыцынскай дапамогі ў мед установах розных узроўняў у Оршы і Віцебску.
У Оршы госці даведаліся пра падыходы ў лячэнні ў шматпрофільнай гарбальніцы №1 ім. Н.А. Семашкі і азнаёміліся з прынцыпам работы міжраённага цэнтра.
У Віцебску ўзбекскім урачам расказалі, як уладкавана і функцыянуе сістэма аховы здароўя вобласці, як аказваецца першасная меддапамога ва ўчастковых бальніцах, амбулаторыях урача агульнай практыкі і ў фельчарска-акушэрскіх пунктах. Затым пазнаёмілі з тактыкай, сучаснымі метадамі дыягностыкі і лячэння, якімі славіцца ў Беларусі Віцебскі абласны клінічны анкалагічны дыспансер. Толькі сёлета тут увялі метад выяўлення патэнцыйна небяспечных пухлін на ранніх стадыях – высокатэхналагічны аналіз вянознай крыві PanTum Detect, сталі прымяняць CAR-T-клетачную тэрапію — гэта спосаб лячэння анкалагічных хворых пры дапамозе сваіх жа імунных клетак, а таксама робяць сучасныя лапараскапічныя аперацыі.
Узбекістан гатовы прымяняць перадавы вопыт замежных краін, у тым ліку Рэспублікі Беларусь, у працэсе трансфармацыі медыцыны. Госці ацанілі абсталяванне, аснашчанасць нашых медустаноў, цяпло ў памяшканнях, нягледзячы на холад на вуліцы, і гасціннасць беларусаў.
— Я ў асноўным звяртала ўвагу на працу службаў мацярынства і дзяцінства. Тут у апошні час мацярынскай смяротнасці наогул не было, паказчыкі дзіцячай смяротнасці вельмі нізкія. Зацікавіла і праца першаснага звяна аказання меддапамогі, ФАПаў, — падзялілася ўражаннем кіраўнік Джамбайскага раённага медыцынскага аб'яднання Самаркандскай вобласці Тазагуль Холікава.
Госці адзначылі, што адрозненні ў ахове здароўя Узбекістана і Беларусі ёсць, таму і прыехалі ўбачыць цікавыя падыходы.
— Нас аб'ядноўвае перамога ў Вялікай Айчыннай вайне, шматгадовая дружба, адна мова, на якой мы размаўляем. Так што, думаю, будзе ўзаемаразуменне і цесная згуртаваная праца, – падагульніў начальнік галоўнага ўпраўлення па ахове здароўя Віцебскага аблвыканкама Міхаіл Вішневецкі.
Крыніца: vitebsk-region.gov.by