Дзень Віцебскай вобласці пройдзе на міжнароднай выставе імпарту ў Шанхаі

Тэматычны дзень Віцебскай вобласці пройдзе падчас 6-й Кітайскай міжнароднай выстаўкі імпарту ў Шанхаі, якая запланавана з 5 па 10 лістапада. Пра гэта паведамілі ў камітэце эканомікі Віцебскага аблвыканкама.

Віцебская вобласць прадставіць на выстаўцы ў КНР свой экспартны і інвестыцыйны патэнцыял. Тэматычны дзень рэгіёну запланаваны на 7 лістапада ў нацыянальным павільёне Беларусі. Сярод запрошаных гасцей будуць прадстаўнікі правінцый Цзянсі, Хэйлунцзян, Гуйчжоу і Шаньдун, з якімі ў беларускага паўночнага рэгіёну падпісаны пагадненні і мемарандумы аб супрацоўніцтве. Бакі падтрымліваюць кантакты ў навуцы, тэхніцы, гандлі, сферах адукацыі, аховы здароўя, спорту і іншых.

Удзел у выстаўцы імпартных тавараў прымуць больш за дзясятак прадпрыемстваў Віцебскай вобласці. Візіт у Шанхай плануюць віцебскі канцэрн "Мяса-малочныя прадукты", Верхнядзвінскі масласырзавод, Полацкі малочны камбінат, філіял "Лепельскі МКК" Віцебскага мясакамбіната, кандытарская фабрыка "Віцьба", заводы "Нафтан", "Полацк-Шкловалакно" і "Аршанскі льнокамбінат". Чакаецца ўдзел "Рузэкспедыцыі" і адміністрацыі свабоднай эканамічнай зоны "Віцебск".

Некаторыя кампаніі правядуць асобныя прэзентацыі. Гасцям прапануюць прадэгуставаць мясную і малочную прадукцыю, кандытарскія вырабы і сухія сняданкі. Свае распрацоўкі і тэхналогіі прадставяць Аршанскі льнокамбінат, заводы "Нафтан", "Полацк-Шкловалакно" і лагістычная кампанія "Рузэкспедыцыя". Свабодная эканамічная зона "Віцебск" і асаблівая эканамічная зона правінцыі Цзянсі на палях 6-й Кітайскай міжнароднай выстаўкі імпарту плануюць падпісаць мемарандум аб супрацоўніцтве. У перамоўнай зоне ў іх адбудзецца сустрэча ў фармаце В2В. Праграмныя дакументы завізуюць некаторыя прадпрыемствы.

Для вытворцаў Віцебскай вобласці рынак Кітая становіцца ўсё больш перспектыўным. Рост экспарту ў рэгіёны КНР набірае абароты: у параўнанні з 8 месяцамі 2022 года пастаўкі ўзрослі ў 1,4 раза, а з 2018 года – больш чым у 5 разоў, адзначылі ў камітэце. Асаблівым попытам карыстаецца харчаванне і сельскагаспадарчая сыравіна. Гаворка пра мяса птушкі, малочную сыроватку, сухія сняданкі, кандытарскія вырабы, ільнавалакно. Акрамя іншага, у Паднябеснай запатрабаваны вырабленыя ў паўночным рэгіёне Беларусі прысадкі да змазачных алеяў, вырабы дрэваапрацоўкі, шклавалакно, фітынгі і ільнатканіі.

"БЕЛТА"

Крыніца: vitebsk-region.gov.by