У Шаркаўшчыне прайшло пасяджэнне абласнога штаба па падрыхтоўцы і правядзенні абласнога фестывалю-кірмашу «Дажынкі-2023»

У Шаркаўшчыне прайшло пасяджэнне абласнога штаба па падрыхтоўцы і правядзенні абласнога фестывалю-кірмашу «Дажынкі-2023» пад кіраўніцтвам старшыні абласнога Савета дэпутатаў Уладзіміра Церанцьева. 

– Тое, што абяцалі людзям, павінна быць выканана, – адзначыў Уладзімір Уладзіміравіч. – У першую чаргу, жыхары Шаркаўшчыны павінны адчуць, як палепшылася камфортнасць іх жыцця, убачыць, што зроблены капітальны і бягучы рамонт жылля, пакладзены дзясяткі кіламетраў новага асфальту і зручныя тратуары.

На пасяджэнні штаба кіраўнікі абласных і раённых арганізацый удакладнілі графікі выканання работ, агучылі праблемы, з якімі сутыкаюцца. Былі прыняты аператыўныя рашэнні, дзе патрэбна пераразмеркаванне сіл, каму і дзе патрэбна дапамога.

Адбылася дзелавая размова, якая дазволіць паскорыць працэс рамонту і будаўніцтва.

– Усе запланаваныя аб'екты не атрымаецца здаць да фестывалю-кірмашу, – канстатавалі члены штаба. – Але тое, што ўжо зроблена, змяніла аблічча горада. Ён на вачах прыгажэе.

У гэтым змаглі пераканацца ўдзельнікі штаба, наведаўшы дзясятак аб'ектаў. Школай будучыні стала СШ № 1 Шаркаўшчыны. Прасторныя прыгожыя кабінеты, сучасная актавая зала, добраўпарадкаваны харчаблок, новае абсталяванне – вось няпоўны пералік таго, што атрымалі да навучальнага года школьнікі. У верасні – кастрычніку побач з будынкам з'явіцца новы стадыён.

Да свята будзе здадзены 40-кватэрны жылы дом. Побач з ім вядзецца добраўпарадкаванне.

– Ужо сёння можна сказаць, што жыццё мяняецца да лепшага, – заўважыў Уладзімір Церанцьеў. – Дзякуючы «Дажынкам» Шаркаўшчына ўжо не з'яўляецца горадам з самай маленькай зарплатай. Ёсць праца, у людзей растуць даходы, жыццё становіцца больш камфортным.

Фота Алены Ананіч, https://vitvesti.by/

Крыніца: vitebsk-region.gov.by