Віцебская вобласць да Форуму рэгіёнаў заключыла кантракты на суму звыш 125 мільёнаў долараў
Для Віцебшчыны ўдзел у гэтай знакавай падзеі мае вялізнае значэнне, бо яна непасрэдна суседнічае з Расіяй, з рэгіёнамі якой даўно і трывала наладжаны шматлікія культурна-эканамічныя сувязі.
Абгрунтаваная падрыхтоўка да форуму вялася на працягу трох месяцаў, падкрэслівае старшыня Віцебскага аблвыканкама Аляксандр Субоцін:
— Перш за ўсё зрабілі акцэнт на міжрэгіянальнае супрацоўніцтва. З гэтай мэтай правялі рэвізію і актуалізавалі дзеючыя і падрыхтаваныя да падпісання сумесныя дакументы (пагадненні, пратаколы, планы мерапрыемстваў), а таксама абмеркавалі з расійскімі партнёрамі магчымасці падпісання пагадненняў з новымі рэгіёнамі.
Касаючыся канкрэтных прыкладаў, кіраўнік Віцебшчыны нагадаў, што ў анлайн-фармаце ў красавіку быў падпісаны План мерапрыемстваў на 2023–2025 гады па рэалізацыі пагаднення паміж Віцебскім аблвыканкамам і адміністрацыяй Кастрамской вобласці аб гандлёва-эканамічным, навукова-тэхнічным і культурным супрацоўніцтве. Падчас Міжнароднага эканамічнага форуму ў Віцебск18 мая заключана дамова аб гандлёва-эканамічным супрацоўніцтве паміж Віцебскам і Архангельскам. Непасрэдна на форуме плануецца падпісаць План мерапрыемстваў на 2023–2025 гады па рэалізацыі дамовы аб супрацоўніцтве паміж Віцебскім аблвыканкамам і Башкартастанам у гандлёва-эканамічнай, навукова-тэхнічнай і гуманітарнай сферах, а таксама План мерапрыемстваў па рэалізацыі дамовы аб супрацоўніцтве паміж Заканадаўчым сходам Рэспублікі Карэлія і Віцебскім абласным Саветам дэпутатаў. Такім чынам, акрамя дамоваў, упор робіцца на падпісанне канкрэтных планаў па іх рэалізацыі.
У частцы ўзаемадзеяння паміж прадпрыемствамі актывізавана работа па падпісанні новых кантрактаў, дапаўненні дзеючых генеральных кантрактаў. Усяго за перыяд падрыхтоўкі да форуму і ў дні яго правядзення будуць падпісаны кантракты з 28 суб'ектамі гаспадарання Віцебскай вобласці. Гэта 123 камерцыйныя кантракты. Сума экспартных кантрактаў склала 2,97 мільярда расійскіх рублёў і 89,1 мільёна долараў. Вынік — каля 125,5 мільёна долараў.
Для павышэння эфектыўнасці супрацоўніцтва Віцебская вобласць робіць стаўку на развіццё прамых кантактаў паміж дзелавымі партнёрамі і рэгіёнамі. І гэты падыход у поўнай меры апраўдвае сябе, акцэнтуюць у камітэце эканомікі Віцебскага аблвыканкама:
— Стварэнне прамых кантактаў паміж вытворцамі і спажыўцамі — найбольш запатрабаваная форма супрацоўніцтва, да якой імкнуцца суб'екты гаспадарання як Беларусі, так і Расіі. Мінуючы ланцужок пасярэднікаў, удаецца павысіць канкурэнтаздольнасць вырабаў па цане, скараціць выдаткі на перавалку грузаў, узмацніць кантроль за якасцю вырабаў, выключыць выпадкі несумленнай канкурэнцыі на агульных рынках, павысіць ступень даверу і адказнасці бакоў. У гэтых мэтах прыняты спецыяльныя планы мерапрыемстваў, кантроль за іх выкананнем ускладзены на ўрады бакоў.
Перспектывы супрацоўніцтва на бліжэйшыя гады празрыстыя, бо ў іх аснове сёння ляжаць пытанні вытворчай кааперацыі паміж прамысловымі прадпрыемствамі, адзначае Аляксандр Субоцін:
— Нам неабходна перш за ўсё замясціць імпарт, які раней паступаў з недружалюбных краін, сфармаваць схемы яго дастаўкі спажыўцам і ўмовы разлікаў. Фактычна трэба амаль цалкам перабудаваць схемы ўзаемадзеяння прадпрыемстваў, іх дылераў, якія дзейнічалі раней, падключыўшы да гэтых пытанняў банкі бакоў, службы, якія займаюцца сертыфікацыяй вырабаў, тэхнічнымі рэгламентамі, кваліфікацыйнымі патрабаваннямі і экспертызай якасці прадукцыі і сыравіны, а таксама тэхпрацэсамі, якія прымяняюцца пры іх выпуску. Таксама важна захаваць канкурэнтаздольнасць вырабаў як на нашых рынках, так і на рынках іншых краін. Цяпер гэтая праца вядзецца сярод прадпрыемстваў машынабудавання, нафтахіміі, энергетыкі, лёгкай і харчовай прамысловасці.
Безумоўна, знешнепалітычная сітуацыя апошніх гадоў адбілася на інтэграцыі беларуска-расійскіх адносін. Аднак для нашых краін санкцыйны ціск Захаду згуляў толькі ў плюс, прымусіўшы правесці рэвізію адносін і ўмацаваць узаемадзеянне. Пры гэтым варта ўлічваць, што інтэграцыйныя працэсы паміж Беларуссю і Расіяй ніколі не спыняліся, але асабліва ўзраслі з 2020 года, канстатаваў Аляксандр Субоцін:
— Гэта бачна па актывізацыі дыялогу на ўзроўні Мытнага саюза, ЕАЭС, СНД, ШАС. Выпрацоўваюцца адзіныя падыходы ў правядзенні валютных аперацый, арганізацыі лагістыкі, выраўноўванні ўмоў ажыццяўлення гаспадарчай дзейнасці, сацыяльнай абароне грамадзян
Па матэрыялах "СБ"
Крыніца: vitebsk-region.gov.by