Галоўнае ўпраўленне па адукацыі: каледжы Віцебскай вобласці плануюць набраць больш за 6,7 тыс. навучэнцаў

Попыт на токароў, трактарыстаў-машыністаў і швачак павялічыўся ў Віцебскай вобласці, паведаміў начальнік аддзела прафесійнай адукацыі галоўнага ўпраўлення па адукацыі Віцебскага аблвыканкама Аляксандр Каралёў.

Сярод запатрабаваных рабочых прафесій на рынку працы рэгіёну спецыялісты вылучаюць некалькі пазіцый. Прадпрыемствам вобласці сёння патрэбны слесары-рамонтнікі, токары, фрэзероўшчыкі, аператары станкоў з праграмным кіраваннем, жывёлаводы, трактарысты-машыністы сельскагаспадарчай вытворчасці. Таксама ёсць попыт на швачак і зборшчыкаў абутку.

Сёлета ў каледжы Віцебскай вобласці плануюць набраць больш за 6,7 тыс. навучэнцаў. Амаль 3,9 тыс. з іх – на ўзровень прафесійна-тэхнічнай адукацыі, астатнія больш за 2,8 тыс. – сярэдняй спецыяльнай.

"Мы бачым павелічэнне попыту на пэўныя спецыяльнасці. Напрыклад, у металаапрацоўцы гэта выклікана развіццём гэтай галіны прамысловасці, у прыватнасці, і па Аршанскім рэгіёне, і па Віцебску. Вялікі заказ у нас пачаў паступаць менавіта з боку машынабудаўнічых прадпрыемстваў. Вядома, у першую чаргу мы арыентуемся на масавыя прафесіі і рыхтуем кадры па іх. Калі казаць пра сельскую мясцовасць, то традыцыйна ў нас запатрабаваны трактарысты-машыністы сельскагаспадарчай вытворчасці, слесары па рамонце сельгасмашын і абсталявання, вадзіцелі аўтамабіля, зваршчыкі. Арыентуемся на патрэбы галін эканомікі вобласці", - растлумачыў начальнік аддзела.

Ён адзначыў, што цяжкасці ў выкананні замовы на падрыхтоўку кадраў вырашаюцца. Толькі адно з абуткавых прадпрыемстваў рэгіёну пакідае ў дзяржаўнай сістэме для замовы кадраў заяўкі на 130 чалавек. Аднак адпаведныя прафесіі ў падлеткаў, выпускнікоў школ не карыстаюцца вялікай папулярнасцю. "Часам выпускнікі школ не хочуць паступаць на спецыяльнасці, звязаныя з некаторымі сферамі, улічваючы складаныя ўмовы працы, заработную плату і іншыя нюансы, - сказаў Аляксандр Каралёў. - Мяркуем, прычына таксама ў негатоўнасці маладых людзей працаваць, павышаць свой узровень і браць адказнасць".

У мінулым годзе Віцебская вобласць перавыканала план прыёму навучэнцаў у каледжы і плануе яго павышаць. "Тут важна ўлічваць таксама той факт, што колькасць выпускнікоў школ у апошнія гады значна не павялічваецца, застаецца прыкладна на адным узроўні. У наступныя гады яна будзе яшчэ і зніжацца - у гэтым і заключаецца асаблівасць. У Віцебскай вобласці 50% дзевяцікласнікаў ідуць для працягу навучання ва ўстановы сярэдняй спецыяльнай адукацыі. Калі браць гэты паказчык па рэспубліцы, то ён складае менш за 40%, - растлумачыў начальнік аддзела. - Мы гатовыя навучаць усіх, хто да нас прыйдзе. Стараемся працаваць і з выпускнікамі ўстаноў агульнай сярэдняй адукацыі іншых абласцей, у прыватнасці, Мінскай і Магілёўскай. Прафарыентацыйная праца вядзецца сур'ёзная, і з'яўляюцца яе новыя формы - кірмашы мэтавай падрыхтоўкі, калі ў школы прыходзяць прадпрыемствы і ўстановы адукацыі. І непасрэдна там ідзе праца па прыцягненні выпускнікоў школ і наступнае заключэнне з імі мэтавых дагавораў на працяг навучання ва ўстановах прафесійнай адукацыі".

"БЕЛТА"

Крыніца: vitebsk-region.gov.by